ROXAS CITY – Liwat nga ginpatuman sang pamunuan sang Teodoro Arcenas Trade Center (TATC) ang minimum health protocol nga pagsuksok sang face mask kag face shield sa mga vendors kag mga bumalakal sa merkado publiko.
Gin-istrikto naman ang pagpatuman sang minimum health protocol matapos nga nagtaas ang kaso sang Covid-19 sa probinsiya.
Ginpahayag ni Mr. Efren Diaz, miyembro sang RESET nga epektibo sang Biyernes nga adlaw gin-implementar ang pagsuksok sang facemask kag faceshield kun magpadulong sa merkado publiko bilang proteksyon batuk sa Covid-19.
Suno kay Diaz nga ila ginasita kag ginapahanumdum ang wala nagasuksok sang face mask kag face shield nga yara sa merkado.
Nahibaluan nga 82 ka mga violators ang nadakpan sa liwat nga pagsugod sang istrikto nga implementasyon sang minimum health protocol sa syudad sa diin ginadala pa ang mga salawayon nga indibidwal sa crisis center.
Samtang nagahulat ang monetary penalty kag community service sa mga pasaway nga mga violators.
