Nagluntad ang tensyon sang pamilya sang nagtaliwan nga National Artist kag Superstar nga si Nora Aunor sa iya 1st death anniversary sang Abril 16.
Sa tunga sang pagtililipon sang mga tagasuporta kag mga pamilya sa Libingan ng mga Bayani sa Taguig City, nagtuhaw ang isyu sa gina-alegar pag-ilinaway sang iya mga anak nga sanday Ian de Leon kag Lotlot de Leon.
Suno sa report, gin-insister ni Ian nga siya ang “sole legal heir” sang iya iloy kag siya ang magadumala sang estate legal matters, lakip na ang plano para sa One Person Corporation (OPC).
Paathag sang kampo ni Lotlot paagi sa iya abogado nga si Atty. Mark Julius C. Estur, ginpahayag sini nga indi interesado ang iya kliyente sa anuman nga palanublion gikan sa propiedad sang ila iloy.
Suno sa ila, wala siya ginkonsulta sa amo nga mga tikang kag indi siya kabahin sang anuman nga fundraising ukon pagdumala nga ginhimo ni Ian.
Ginpanindugan man nila nga wala nagapangita sang anuman nga palanublion si Lotlot kag mas luyag sini nga likawan ang isyu agud respetuhon ang handumanan sang ila iloy.
Apisar sang isyu sa pamilya, ang mga himata kag mga fans nagtipon gihapon para sa isa ka pribado nga memorial service sa Eastwood City agud dumdumon ang kabuhi kag legasiya sang nagtaliwan nga Superstar.
