ROXAS CITY – Nagpaathag ang isa ka IT expert angut sa nagalapta nga mga dummy accounts sa face book kag ang posible mangin biktima sang mga hackers.
Ginpahayag ni Malcom Milton Aguirre, IT kag data protection officer sang Capiz Emmanuel Hospital nga indi tanan nga nagagamit sang FB ang may ideya sa pagsecure sa ila mga personal information ukon data.
Suno kay Aguirre nga tuman ka importante nga ma-secure sang isa user ang iya personal data bangud mahimo ini nga magamit sang mga hackers.
Apang mahimo nga ma-locate pinaagi sa IT tracing ang lokasyon sang device ukon IP address nga gingamit, apang indi direkta ang naghimo sang fake account.
Mahimo man nga ma-report sa National Privacy Commission kag Anti Cyber Crime division sang PNP kun makaangkon sang dummy account sa diin ginkuha ang impormasyon sang isa ka user.
Bangud diri nagpahanumdum si Aguirre sa mga FB users nga likawan ang pagbisita sa mga website nga nagapangayo sang personal data sang user bangud masami diri nagasugod ang pag-hack sang account.
Samtang posible nga pagasuguran na sang Facebook Philippines ang imbestigasyon sa nabaton nga mga reports angut sa pagtuhaw sang mga dummy accounts sa nasambit nga social networking site.
Ginpahayag ni Aguirre, nga natigayon na nga mapalab-ot sang National Privacy Commission (NPC) sa FB ang mga fake accounts nga nagalapta sa karon kag paga-aktuhan sa masunod nga mga inadlaw.
