ROXAS CITY – Nagpaguwa sang schedule ang gobyerno sang Italy para sa liwat nga pagbukas sang mga establisyemento sa nasambit nga pungsod kasunod sang ginpatuman nga lockdown bangud sa coronavirus disease (COVID-19) pandemic.
Sa report sa Bombo Radyo ni Bombo International Correspondent Miles De Guzman nga naba-se sa Milan, Italy, ginpahayag sini nga kahapon, Abril 14, nagpaguwa sang official schedule ang Italian government para sa pagbukas sang pila ka mga establisyemento sa pungsod.
Suno diri nga sini nga Abril amat-amat nga pagabuksan ang mga public libraries, stationaries stores, boutiques magluwas na lamang sa mga dalagkuan nga malls.
Humalin Abril tubtob Mayo naman amat-amat nga magabalik sa sa ila operasyon ang pila ka mga opisina kag hotels.
Sa bulan sa Setyembre naman ginalauman nga magabukas ang mga eskwelahan sa pungsod.
Ginalauman naman nga pagabuksan ang ila ka mga recreational establishments kapareho sang cinema kag theatre sa Disyembre kag sa Marso sa masunod nga tuig 2021 pa magabalik ang operasyon sang mga clubs.
Ginkompirmar man sini nga nakabaton na sang bulig gikan sa gobyerno sang Italy ang pila ka Pinoy nga nadulaan sang trabaho bangud sang krisis.
Ini ang pinaagi sang Buoni Spesa ukon food shopping voucher nga nagabalor sang 150 tubtob 300 euros.
