IVISAN, CAPIZ – Padayon ang pagmonitor sang Ivisan Municipal Disaster Risk Reduction and Management Office (MDRRMO) sa nagluntad nga landslide bangud sang mamunog nga pag-ulan.
Sa interview sang Bombo Radyo kay Maribel Beluso-Andrada, Chairperson sang Ivisan Municipal Disaster Risk Reduction and Management Office (MDRRMO), iya ginpahayag nga may isa ka balay ang nabalhag nga natambakan sang nagluntad nga landslide apang hilway man sa bisan ano nga kahalitan.
Suno kay Andrada, nagapakig-angot man ang ila talatapan sa blocal government sang Ivisan agud makapadala sang heavy equipment sa barangay officials nga magabulig sa paghimos sang mga duta kag bato nga nagtambak sa dalanon.
Pahayag pa niya, nag-subside naman ang pagbaha gani passable na ang halos tanan nga dalan.
Nakabalik naman ang pila ka mga pumuluyo nga nag-evacuate sa ila sini tagsa ka mga panimalay.
Nahibaluan nga sang sabado nga adlaw, Pebrero 7, nagbubo ang mamunog nga ulan nga nagtuga sang baha kag landslide sa pila ka mga lugar sa probinsya sang Capiz.
Nagpanawagan man ang natungdan sa publiko nga magpabilin nga aligmat sa palibot kag siguruhon ang kaluwasan sang kaugalingon kag pamilya sa tion sang kalamidad.
