ROXAS CITY – Padayon ang pagpatigayon sang imbestigasyon sang katapo sang Ivisan PNP angut sa isa ka gasolinahan nga ginapahayag ginsulod sang wala pa matumod nga kawatan.
Sa interview sang Bombo Radyo kay PMSG. Lord Amosig Chief Investigator sang Ivisan PNP, ginpahayag sini nga takna 9:00 sang gab-i Nobyembre 9, 2023 ginapahayag ginsulod sang kawatan ang amu nga gasolinahan.
Suno kay Amosig, posible nag-agi ang kawatan sa atup pinaagi sa pagwasak kag diri man nag-agi agud makaguha.
Mahibaluan nga sa ila inisyal nga imbestigasyon nagdangat sa masobra P60,000 nga benta ang nataban.
Ginpahayag man ni Amosig nga nabatyagan man suno diri sang kaiping nga puluy-an apang wala ini ginhatagan sang pagtamud bangud temprano pa kag wala ginalauman nga ginasulod na ini sang kawatan.
Sa karun, padayon pa ang ila pagpatigayon sang masangkad nga imbestigasyon kag pagpangita sang mga anggulo agud dalayon nga madakpan kag makilan-an ang suspek.
Panugyan sini sa mga residente nga magpalapit lamang sa ila talatapan sa tion nga may nahibaluan kag nakit-an sa amu nga oras agud makadugang sang impormasyon sa ila pag-imbestiga.
