ROXAS CITY – Ginkompirmar ni Jamindan Mayor Mac Arthur Valdemar nga gin-aprubahan sang Regional Inter-Agency Task Force ukon RIATF ang resolution nga nagahinyo sang isa ka bulan nga “time-out” sa pagpapuli sa mga LSI’s sa ila nga banwa.
Sa interview sang Bombo Radyo kay Valdemar nga sumugod sa Disyembre 5 tubtob Enero 5 indi anay magabaton sang mga LSI’s ang nasambit nga banwa.
Apang, ginklaro sini nga padayon sa gihapon ang pagbaton sa mga Returning Overseas Filipino’s (ROF’s) kag Authorized Person’s Outside Residence (APOR).
Suno kay Valdemar nga ginpakamaayo anay sini nga untaton ang pagbaton sang mga LSI’s bangud luyag sini nga mahatagan sang pahuway kag kusog ang ila mga frontlines kag medical workers.
Sa pihak sang temporaryo nga pagpauntat sa pagbaton sang mga LSI’s padayon sa gihapon ang serbisyo medikal sa amo nga banwa.
Dugang pa sini nga magapatigayon man sila sang disinfection sa tanan nga mga quarantine facility.
Ginpahayag pa ni Valdemar nga nadesisyunan niya ini bangud naintiendihan niya ang kapoy nga nabatyagan sang mga frontliners kag medical workers sa anom ka bulan nga pag-antus bangud sa COVID-19 Pandemic.
Gani, ginhatagan niya ini anay sang tsansa nga makapahuway kag makaupod man ang ila pamilya sa adlaw sang paskwa.
Gin-athag naman sang alkalde nga bastante pa man ang pondo sang amo nga banwa kun sa diin masarangan pa nga mahatagan sang pagkaon kag kinahanglanon ang mga LSI’s, kag ROF’s nga nagapaidalom subong sa quarantine period.
Mahibaluan nga naglab-ot sa kapin 700 ka mga LSI’s, 150 ka mga ROF’s kag 40 ka mga APOR ang gin-akomodar subong nga adlaw sang Miyerkules, Disyembre 2,2020.
Samtang, nagapanawagan naman si Valdemar sang hugot nga kooperasyon sa mga pumuluyo sang amo nga banwa nga mag-ugyon kag magsunod sa mga minimum health protocols agud malikawan ang pagdamo sang kaso sang amo nga virus.
