May yara na sang person of interest ang mga kapulisan sang Jamindan Municipal Police Station sa pagluthang-patay sa isa ka manunudlo sa Sitio Burwang, Barangay Linambasan, Jamindan, Capiz.
Ang biktima amo si alyas Jo-Ann, 44-anyos, residente sang nasambit nga lugar kag isa ka manunudlo.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga padayon nga ginapatigayon sang mga kapulisan ang maid-id nga imbestigasyon agud mahatagan sang hustisya ang kamatayon sang biktima.
Suno kay Garnica, padayon man nga gina-monitor kag gina-verify sang mga kapulisan ang person of interest of agud matigayon na nga madakop.
Pahayag niya, wala naga-untat ang mga kapulisan sa pag-imbestigar agud masigurado nga mapasabat ang kinahanglan nga magpanabat sa amo nga krimen.
Nagapasalig naman ang natungdan sa pamilya nga mahatag gid ang hustisya sa kamatayon sang ila nga himata kag nagapanawagan ini sang kooperasyon sang mga tawo nga may nahibaluan sa nasambit nga krimen.
Interviewed by Bombo Sunnie Mae Constantino Batencila | via Bombohanay sa Udto
