ROXAS CITY – Padayon ang pagpatigayon sang imbestigasyon sang katapo sang Jamindan Municipal Police Station, angut sa nagluntad nga pagpanglabo sa tatlo ka mga indibidwal sa Sitio Agtutulang, Barangay Lapaz, Jamindan Capiz.
Sa interview sang Bombo Radyo kay PLT. Joebert Delos Reyes hepe sang Jamindan Municipal Police Station, ginpahayag sini nga ginapreparar na nila si John Villanueva suspek sa pagpanglabo agud ma-inquest.
Suno kay Delos Reyes, magapangatubang sa kaso nga double murder kag frustrated murder si Villanueva.
Matandaan, ginabulubanta 12:00 sang maga-aga sadtong tinalikdan nga Setyembre 29, 2023 samtang nagakatulog sanday Dindo, Rodel kag Archie Georlin ginsulod sang suspek nga si John Villanueva ang ila ginadayunan nga balay kag wala sang kaluoy nga ginpanglabo ang mga biktima.
Apisar nag-angkon sang pilas, madasig nga nakapalagyo sa lugar si Archie kag nakapangayo sang bulig.
Suno kay Delos Reyes, narekober sa lugar sang insidente ang isa ka baseyo sang indi pa matumod nga armas-luthang nga sa karun ginapaidalum sa ballistic examination.
Posible man suno diri nga indi lamang isa ang may kahimuan sa likod sang insidente rason nga padayon ang ila pagpatigayon sang maid-id nga imbestigasyon.
Natigayon nga madakpan si Villanueva samtang, nagalakat-lakat ini sa iban nga lugar kag ginapahayag matawhay nga nag-upod sa kapulisan sang gin-aresto.
Sa karun, natalana nga ipauli na sa ila tagsa ka mga lugar ang biktima agud mahatagan sang pormal nga lubong sang pamilya.
