Isa ka fangirl dream come true ang na-eksperyensya sang aktres nga si Janice de Belen, matapos nga nagsaka sa entablado upod sa Korean superstar nga si Song Joong Ki sa iya fan meet sa isa ka mall sa Pasay sang nagligad nga Sabado.
Sa isa ka post sa social media, gin-share ni Janice ang mga litrato nga nagapakita kay Joong Ki nga nagahatag sa iya sang mga bulak kag nagahakos sa iya sa atubang sang linibo ka mga fans.
“Omg! Tonight was a super, super amazing night! … He is my ultimate fave Korean actor!” suno kay Janice nga nag-ako man nga daku nga bahin sang iya emotional recovery ang K-drama nga ‘Descendants of the Sun’ matapos nga nagtaliwan ang iya iloy.
Nahibaluan nga si Song Joong Ki nangin bantog bilang si Captain Yoo Shi Jin sa ‘Descendants of the Sun’ kag nag-arte man sa K-dramas nga ‘Vincenzo’ kag ‘Reborn Rich,’ subong man sa pelikula nga ‘Space Sweepers.’
Ang fan meet nga ginpatigayon sa Manila amo ang una nga pagbisita ni Joong Ki sa nasambit nga pungsod.
