Gintay-og sang magnitude 7.4 nga linog ang northeastern part sang Japan, rason nga nagpagwa sang tsunami warning ang mga otoridad sa pila ka mga coastal areas.
Suno kay Bombo Josel Palma, international correspondent nga direkta sa Japan, narekord ang epicenter sang linog sa bahin sang baybayon sang Sanriku, ginabanta 100 kilometers sa sidlangan sang Miyako City sa Iwate Prefecture.
Dugang pa ni Palma, ang una nga tsunami wave nga naglab-ot sa halos 40 centimeters ang narekord sa pantalan sang Miyako, samtang may natukiban man nga tsunami sa baybayon sa palibot sang Aomori Prefecture sa northern nga bahin sang pungsod.
Nagpagwa man sang paandam ang Japan Meteorological Agency nga posible maglab-ot sa tatlo ka metros ang kataason sang tsunami sa pila ka bahin sang baybayon sang Iwate kag Hokkaido.
Sa subong ginapatuman ang evacuation sa mga coastal areas lakip na ang Miyagi Prefecture kag Fukushima Prefecture.
Padayon ang monitoring sang mga otoridad sa sitwasyon kadungan sang pagpahanumdom sa mga residente sa coastal areas nga magpabilin nga alerto kag gilayon nga magsunod sa evacuation orders agud malikawan ang posible peligro dala sang tsunami.
