Nagpirma na sang isa ka defense deal ang Pilipinas kag Japan agud labi pa nga mapabaskog ang deterrence sa tunga sang nagalala nga agresyon sang China kag agud mapabaskog ang pagsabat sa kalamidad.
Ini ang Acquisition and Cross-Servicing Agreement nga ginpirmahan sang Japanese Foreign Minister Toshimitsu Motegi kag Philippine Foreign Affairs Secretary Theresa Lazaro sa Manila.
Lakip sa kasugtanan ang pagpahanugot sa paghatag sang ammunition nga wala sang tax, langis, pagkaon kag iban pa nga mga kinahanglanon sa tion nga magpatigayon sang joint training ang pwersa sang duha ka pungsod.
Magluwas sa combat drills, ang nasambit nga kasugtanan ang makabulig sa Japan kag Pilipinas nga tingub nga magsabat sa mga kalamidad, kag magpartisipar sa United Nations peacekeeping operations.
Gin-anunsyo man sang Japan ang bag-o nga bulig sa seguridad kag pagpauswag sang ekonomiya para sa Pilipinas, lakip na ang pondo para sa pagtukod sang mga security boat shelter kag pagpasangkad sang internet access sa mga imol nga probinsya sa nabagatnan nga Pilipinas nga naigo sang isa ka Muslim minority rebellion.
Ang military logistics agreement kinahanglan pa nga i-ratify sang mga mamalidha sang Japan antes ini mag-epekto.
Ini ang pinakaulihi nga mayor nga kasugtanan sa depensa nga ginpirmahan sang Japan kag Pilipinas agud labi pa nga mapadalman ang kaangtanan sa depensa.
