Nagpaandam ang mga awtoridad sa Japan sa posible nga pag-igo liwat sang mabaskog nga linog matapos ang magnitude 6.9 nga linog nga nagtay-og sa Northern Japan.
Sandig sa Japan Meteorological Agency (JMA), ang sentro sang linog narekord sa kadagatan nga sakop sang Iwate Prefecture kag may kadalumon nga nagalab-ot sa 50 kilometro.
Wala man sang ginpaguwa nga tsunami advisory matapos ang paglinog.
Suno kay Bombo International Correspondent Jocel Palma nga direkta sa Japan, may yara sang ginabanta nga 10 tubtob 20 porsiyento nga posibilidad nga may mas mabaskog pa nga linog nga maga-igo sa masunod nga duha tubtob tatlo ka adlaw.
Bangud sini, padayon nga nakaalerto ang mga residente sa mga apektado nga lugar.
Base sa mga report sang mga awtoridad, naglab-ot sa pulo ka tawo ang nasamaran bangud sang linog.
Sa pihak sini, wala sang nabalhag nga Pinoy nga nasamaran sa amo nga insidente.
Padayon ang pagpahanumdom sang mga awtoridad ang publiko nga mangin mabinantayon, magpabilin nga alerto sa posible nga mga aftershock kag magsunod sa mga abiso sang lokal nga panguluhan agud masiguro ang kaluwasan.
