ROXAS CITY – Gin-ulan sang madakmol nga nyebe ang Northern Regions sang pungsod Japan humalin sang nanligad nga semana. Ang naekperensyahan nga heavy snowfall sa lugar sa karon tatlo ka pilo ang kadakmolon sa average nga snowfall kada tuig.
Sa pagpakig-angut sang Bombo Radyo kay Mr. Josel Palma, Bombo International Correspondent direkta sa Japan, ginsiling sini nga bangud sa snowfall 17 na ang nabalhag nga patay kadungan sang selebrasyon sang paskwa.
Kadam-an sa gintunaan sang ila kamatayon amu ang pagkahulog sa ila atup samtang ginakakas ang snow kag natambakan sang madamol nga nyebe.
Magluwas sa napatay, 90 naman ang naman ang napilasan, linibo nga mga puluy-an ang nadulaan sang power supply kag ginatos nga mga salakyan kag deliveries ang nastranded bangud sa kalamidad.
Gindayaw man ni Palma, ang kahandaan sang Disaster Team sang Japan, bangud gilayon nga nag-augment sang team para sa pagrescue sa mga trap sa ila puluy-an, paghawan sa dalanon pinaagi sa pag-usar sang mga heavy equipment kag madasig nga pagresponde ilabi na kun emerhensya.
Masuwerte naman suno diri, nga wala sang Pilipino nga nabalhag nga naulamid sa kalamidad.
Panugyan sini sa bug-os nga Filipino-Community sa Japan, nga mangin mahalong sa tanan nga oras.
