ROXAS CITY – Dalayawon ang madasig nga paghatag sang solusyon sang Japanese government sa kahalitan nga tuga sang typhoon Hagibis sa nasambit nga pungsod.
Ini ang base sa report ni Bombo international correspondent Nieva Gevero Nacionales, tumandok sang San Vicente, Jamindan, nga nakaba-se sa karon sa Yokohama, Japan kag nagatrabaho bilang caregiver.
Suno sa iya nga humalin sadtong adlaw sang Huwebes tubtob Sabado sang gab-i sang ila nabatyagan ang tuman nga pagpanglaslas sang nasambit nga bagyo apang naghina ini subong nga adlaw sang Dominggo.
Sa pihak sang nagkalaguba nga mga edipisyo kag establisyemento, balik sa normal suno kay Nacionales ang tanan bangud sa madasig nga aksyon sang gobyerno sa nasambit nga pungsod.
Gindugang pa sini nga napreparahan man sang tanan ang pagpanglaslas sang bagyo bangud sa wala-untat nga paghatag sang abiso kag paandam sang gobyerno.
Aminado man ini nga nabatyagan nila ang pagkaubos sang suplay sang mga nagapanguna nga produkto sa mga merkado bangud nagpanic-buying ang mga tawo sa lugar sang ginreport nga magaigo ang nasambit nga bagyo sa pungsod.
PHOTO FROM WEB
