Nagapanawagan si Monsignor Meliton Oso, Director sang Jaro Archdiocesan Social Action Center (JASAC), sa publiko nga magpasakop sa nationwide nga “Trillion Peso March” nga patigayunon sa Dominggo, Setyembre 21.
Ang nasambit nga hublag-protesta ang may katuyuan nga pamatukan ang malapnagon nga pagpangawat sang pondo sang banwa kag ang madugay na nga kultura sang korapsyon sa gobyerno.
Sa interview sang Bombo Radyo kay Oso, iya ginpahayag nga isa ini ka sahi sang pagpamukaw sa mga Pilipino.
Kinahanglan nga ipakita sang mga tawo ang kaisog, kusog, kag determinasyon nga pakigbatuan ang korapsyon kag pagpangawat sa kaban sang banwa.
Suno kay Oso, kadungan sang anibersaryo sang deklarasyon sang Martial Law sang 1972 sa idalom ni anay diktador Ferdinand Marcos Sr., ang protesta maga-umpisa sa People Power Monument sa Quezon City, kag may yara man sang dululungan nga pagtililipon sa nagkalain-lain nga kaprobinsyahanan, kalakip ang Iloilo, kun sa diin nga masako ini sya sa pagpakighinun-anon sa mga grupo agud nga masiguro nga maayos ang lokal nga hiliwaton.
Gindayaw man ni Oso ang Catholic Bishops’ Conference of the Philippines (CBCP) sa ila maisog nga pastoral letter hanungod sa korapsyon sa flood control projects.
Pahayag pa sang natungdan, sa nasambit nga sulat, ginpanginwala sang Catholic Bishops’ Conference of the Philippines (CBCP) ang kredibilidad sang mga imbestigasyon sa korapsyon, kag napamangkot kun mapatihan pa ayhan ang mga imbestigasyon kun mismo ang mga institusyon nga nagapatigayon involved man.
Interviewed by Bombo Francis Biñas
