Nakaabot sa panibag-o nga milestone sa iya karera si Jayson Castro matapos niya makuha ang iya ika-10,000 nga puntos sa kadalag-an sang TNT Tropang 5G kontra NLEX Road Warriors, 96-93, sa PBA Commissioner’s Cup quarterfinals.
Nangin ika-17 nga local player kag ika-18 sa kabug-usan sa kasaysayan sang PBA si Castro nga nakaabot sa amo nga kadungganan matapos siya makashoot sang free throw sa ikatatlo nga quarter sang dula.
Suno kay Castro, daku ang iya kalipay nga malakip sa listahan sang mga kilala nga manugbasket pareho kanday Robert Jaworski, Nelson Asaytono, Jojo Lastimosa kag Jerry Codiñera. Ginpahayag man niya nga nagpanikasog siya sa pag-atipan sang iya lawas agud maabot ang amo nga achievement kag padayon nga makabulig sa iya mga kaupdanan sa koponan.
Ang milestone ni Castro nag-abot matapos siya makaagom sang grabeng injury sa tuhod sang nagligad nga tuig nga nagpalayo sa iya sa basketball antes siya nakabalik sa pagdula sang Marso sini nga tuig. Suno sa beterano nga player, mas nangin maalwan siya subong sa pag-atipan sang iya lawas bangud gusto pa niya makadaog sang dugang nga kampeonato antes matapos ang iya karera.
Ginpabugal man ni TNT head coach Chot Reyes ang paglambo ni Castro halin sang ma-draft ini sang franchise sang 2008, kag ginsiling nga ang pag-angkon nila kay Castro isa sa pinakamainuswagon nga desisyon sang koponan
