ROXAS CITY – Nagpalanakit ang lawas sang isa ka jeepney driver matapos nga ginsumbag sang security guard sang isa ka eskwelahan sa Pueblo de Panay, Barangay Lawaan, Roxas City.
Ginkilala ang biktima kay Armando Polonan, residente sang Barangay Sibaguan, sining siyuda.
Base sa inisyal nga impormasyon, nakabaton sang tawag gikan sa sekyu nga si Roberto Fontillar ang biktima nga may tatlo ka mga estudyante sa eskwelahan nga kinahanglan mapick-up.
Naatrasar sa pagpadulong sa eskwelahan ang biktima bangud nagapila pa ini sa Roxas City Integrated Transport Terminal.
Pag-abot sa nasambit nga eskwelahan didto kag ginaalegar ginbutong ni Fontillar ang bayo ni Polonan kag ginsumbag ini.
Nag-angkon sang bagras sa guya kag nagpalamanog ang dughan sang biktima bangud sang pagpangsumbag sang suspek.
Bangud diri ginpakamaayo na lamang sang biktima nga iparekord sa pulisya ang insidente.
