ROXAS CITY – Menus ang kita, wala na halos mapauli sa pamilya, malaka pa ang pasahero, ini ang pila sa mga gintuad sang isa ka jeepney driver sa bahin sang Pueblo Terminal, Roxas City.
Sa pagpakig-angut sang Bombo Radyo kay Mr. Michael Arro, Jeepney Driver sang Mambusao vice versa, ginsiling sini nga perwisyo ang liwat naman nga pagpataas bangud husto nalang ang ila kita pang gasolina.
Wala paman sila nakapataas sang plete bangud wala pa nakakuha sang fare matrix.
Masuwerte nalang suno diri kun makapauli P1,000 apang masami nagalab-ot lamang sa P500-P700 ang ila kita sa isa ka adlaw bangud malaka man ang pasahero nga nagapadulong sa terminal.
Ginahinyu sini sa gobyerno nga nahibaluan man ang ila sitwasyon nga mga drivers nga buligan sila kag himuan paagi nga magnubo ang presyo sang gatong.
