Legend na kun makabig ang loveteam nga Jo-Mar ukon Jolina Magdangal kag Marvin Agustin bilang kilala sa mga klasik nga love team sa Pilipinas sadtong 90’s gani isa ka nostalgic nga experience ang nabatyagan sang mga fans matapos liwat nga magaupdanay ang duwa sa isa ka pelikula nga may tigulo ‘Ex Ex Lovers’.
Ang isa ka bagay nga nagapanami pa sang ila nga partnership amu ang kamatuoran nga wala sila nangin magkahagugma sa matuod-tuod nga kabuhi. Ginabuligan sini ang ila onscreen romance nga magdugay, gani padayon nga napabaskog pa ang kilig kag pag-admire sang ila nga mga fans.
Kun nangin magkahagugma sila sa matuod-tuod nga kabuhi, posible nga indi na magdugay ang magic sang ila nga pag-upod. Ang kamatuoran nga mag-abyan sa gihapon sila in real life ang mas labi nga nagapasikat kag nagapabakod sa ila nga onscreen chemistry.
Ang ‘Ex Ex Lovers’, nga gindirek ni JP Habac, ang nagapakita kag nagatalakay sa isa ka divorce. Ang setting sang pelikula sa Malta—isa sa mga ulihi nga pungsod nga nagbukas sang layi nga nagatugot sang diborsyo.
Sa pelikula, ang karakter ni Jolina nga si Joy ang magapadulong sa Malta kag hinyuon sa iya estranghero nga partner nga si Ced (na ginabidahan ni Marvin) nga maglakat kaupod ang ila anak nga babaye sa iya nga kasal. Ang emosyonal nga tensyon sa tunga sang iconic duo ang nangin rason sang drama kag humor nga nakaandan sa isa ka manami nga romantic comedy.
Ang pelikula man ang isa ka pagdumdom sa panahon sang ’90s nga rom-com’, kun sa diin ang mga love team ang masami nga nakilala bangud sa ila nga chemistry kag pagiging relatable kun ikumparar sa mga catchy nga pangalan ukon branding sa karon. Samtang, sa karon wala pa sang petsa kun san-o malantaw ang nasambit nga pelikula.
