Kinahanglan sang mas komprehensibo nga approach sa pagpatuman sang Juvenile Justice System sa Pilipinas agud mapunggan ang padayon nga pagdamo sang mga krimen nga involved ang pila ka mga kabataan.
Sa interview sang Bombo Radyo kay Dr. Philip Ian Padilla, interim dean of UP Mindanao School of Medicine, iya ginpahayag nga indi lamang mental kag psychological support ang kinahanglan sang mga kabataan nga nalakip sa krimen, importante man ang suporta halin sa pamilya, komunidad kag gobyerno agud mapunggan ang nagkalain-lain nga factors nga mahimo magtulod sa mga menor de edad sa paghimo sang krimen.
Suno kay Padilla, nakabatyag ini sang pagkadismaya sa kakulangan sang nagakaigo nga mga pasilidad sa mga rehabilitation center sa pungsod.
Importante ang amo nga mga pasilidad agud mahatagan sang nagakaigo nga intervention, guidance kag oportunidad nga makabag-o sang kabuhi ang mga kabataan nga nakahimo sang sala.
Dugang pa sang natungdan, kinahanglan magbinuligay ang komunidad sa pagproteher kag paggiya sa mga kabataan agud malikawan ang ila pagka-involved sa krimen kag mabuligan sila nga makaangkon sang mas maayo kag matawhay nga palaabuton.
