ROXAS CITY – Nagpanindugan si Board Member Weldie Apolinario nga para lamang sa kaayuhan sang gobyerno-probinsiyal kag pumuluyo sang Capiz ang nagtulod sa iya agud magdihon sang isa ka open letter nga naka-address kay Governor Esteban Contreras nga nagapa-revoke sang appointment ni Provincial Administrator Edwin Monares.
Ini ang ginpahayag mismo ni Apolinario kasunod sang iya pagbasa sang iya gindihon nga sulat sa iya nangin diskurso-pribilehiyo sa ginpatigayon nga sesyon sang Sangguniang Panlalawigan.
Suno sa opisyal isa ka dako nga sala ang pagpili sang gobernador kay Monares nga mangin provincial administrator bangud sa madamo nga mga rason nga isa-isa man sini nga ginpatpat.
Ginpahayag ni Apolinario nga wala sini ginakwestiyon ang kaalam ni Monares apang bangud sa iya mga aktwasyon, sa baylo nga mangin asset, nangin liabilidad pa ini sang gobyerno-probinsiyal.
Partikular nga gintumod ni Apolinario nga ginmantsahan ni Monares ang talatapan sang gobernador kalakip ang pangalan sang ila pamilya nga nagresulta sa pagkadula sang ‘trust and confidence’ sini sa liderato sang karon nga administrasyon.
Ginapanindugan pa ni Apolinario nga ‘unfit’ si Monares sa amo nga posisyon bangud sa indi maayo nga pagbinatasan, kakulang sang administrative skills kag kapaslawan nga maka-connect kag maka-develop sang maayo nga relasyon sa Sangguniang Panlalawigan kag Office of the Governor, arogante kag indi pagbaton sang kasal-anan sa diin masami ginabasol ang iban sa iya mga kapaltahan, kakulang sang diplomatic skills sa pagresolbar sa problema kag ang paghingalit sa ‘hospitality’ sang probinsiya pinaagi sa pag-estar sa Governor’s mansion nga pamatood lamang nga indi ini residente sang probinsiya.
Bangud diri, nagpanindugan si Apolinario nga ginarekomendar sini sa gobernador ang pag-revoke ukon pag-recall sa appointment ni Monares bilang provincial administrator apang kun wala sang himoon nga tikang ang gobernador, maga-file ini sang resolusyon sa Sangguniang Panlalawigan nga nagawithdraw ukon nagabawi sang iya pirma kag boto para sa kumpirmasyon ni Monares bilang provincial administrator.
