ROXAS CITY – Sumugod bwas nga adlaw, Agosto 12, pagapasudlan na sang mga coronavirus disease (COVID-19) ‘asymptomatic’ patients ang Kabalaka Isolation Facility nga amo ang Capiz Gymnasium sa Villareal Stadium sa Barangay Tiza, Roxas City.
Ini ang ginpahayag Hospital Management Section (HMS) head Dr. Alex Nolasco sang mainterview sang Bombo Radyo.
Suno kay Nolasco, nagahulat lamang sila sang komunikasyon sang mga local government units (LGU’s) natuhoy sa mga pasyente nga ila iga-endorso agud ma-isolate sa amo nga pasilidad.
Suno diri nga ila man nga pagahinalaan kun dalayon nga pasaraduhan ang stadium ukon kordonan lamang ang gymnasium.
Matandaan nga sadtong Agosto 10, 2020 ginpatigayon ang blessing kag inagurasyon sa amo nga pasilidad nga ginpangunahan mismo ni Capiz Governor Esteban Evan ‘Nonoy’ Contreras kag iban pa nga mga opisyales sang gobyerno-probinsiyal.
May yara sang kapin 48 ka mga isolation tents ang ginpahamtang sa basketball court sa sulod sang nasambit nga pasilidad.
Samtang plano pa ini nga dugangan para naman sa mga magpamilya nga maga-positibo sa amo nga sakit.
Ang tagsa ka modular tents ang may yara sang higdaan, lamesa, pulungkuan, electric fan kag hygiene kit.
May ipahamtang naman nga mga kapulisan sa palibot sang pasilidad agud masiguro nga indi makaguwa ang mga naka-isolate nga indibidwal.
