ROXAS CITY – Padayon pa nga ginahibalo sang mga katapo sang Roxas City Fire Station, ang kabangdanan sa nagluntad nga sunog sa Inocencio St. Barangay Tiza, Roxas City.
Sa interview sang Bombo Radyo Fire and Arson Investigator sang Roxas City Fire Station nga si SFO1 Albert Amago, ginpahayag sini nga indi pa nila sa karun matul-id kung anu ang gintunaan sang sunog sa isa ka puluy-an kag bodega nga na-totally burned.
Matandaan nga totally burned ang isa ka balay kag isa ka bodega matapos masunog kung sa diin ginkilala ang mga tag-iya sang puluy-an nga sanday Hermenio Dolpo Jr., 27-anyos samtang ang bodega naman ang ginapanag-iyahan ni Elma Albano, 47-anyos.
Suno kay Amago, nakabaton sila sang tawag takna alas 4:20 sang kaaganhon nga gilayon nila nga ginrespondihan kag nadeklarar nga fireout takna alas-4:48 na sang aga.
Mahibaluan nga human sa light materials ang amu nga puluy-an kag bodega kag naglab-ot sa kapin P11,025.00 ang ginbilin nga halit sang nasambit nga sunog.
