Ginpanindugan sang isa ka grupo sang mga pamatan-on nga ang posible nga pagpakita ni Mary Grace Piattos sa impeachment court ang indi maka-abswelto kay Vice President Sara Duterte.
Sa interview sang Bombo Radyo kay Arlie Bosque, Secretary General sang Kabataan Partylist Panay, iya ginpahayag nga indi bastante ang pagpakita ni Piattos agud maabswelto ang bise presidente sa kaso nga impeachment nga iya ginapangatubang.
Suno kay Bosque, wala sang record kay Mary Grace Piattos sa Philippine Statistics Authority (PSA), nga suno sa iya isa ka indikasyon nga posible alyas ang pangalan kag indi matuod nga identity.
Bangud sini, nagapati ini nga makapabaskog ang pagpakita ni Piattos sa mga isyu may kaangtanan sa ginaalegar indi husto nga paggamit sang confidential funds.
Dugang pa ni Bosque, importante nga mabatian ang testimonya ni Piattos agud maklaro kun diin kag paano gingamit ang confidential funds. Nagalaum man ang ila grupo nga mapadasig ang proseso sang impeachment trial agud gilayon nga mapanabat ang sin-o man nga mapamatud-an nga responsable.
