Nagapanawagan ang Kabataan Party-list- Panay nga ibasura na ang K to 12 Program bangud wala sini natuman ang ginpromisa nga benepisyo para sa mga estudyante.
Sa interview sang Bombo Radyo kay Arlie Bosque, Secretary General sang Kabataan Party-list Panay, iya ginpahayag nga sa pihak sang dugang nga duha ka tuig ukon ang Senior High School, madamo sa gihapon nga mga SHS graduates ang nagapangatubang sang problema sa pagpangita sang obra kag pagsulod sa kolehiyo.
Suno kay Bosque, sa baylo nga makahatag sang dugang nga kahigayunan sa kabataan, nagdugang lamang ang K to 12 Program sang gasto sa mga ginikanan kag dugang nga pagtulun-an sa mga estudyante.
Pahayag pa niya, nagapadayon ang ila panawagan sa gobyerno nga repasuhon ang programa kag pamatian ang mga panawagan sang mga estudyante, manunudlo kag ginikanan nga naapektuhan sini.
Dugang pa sang natungdan, kinahanglan ang mas epektibo nga mga education system nga magabulig hatag sang solusyon sa nagapadayon nga mga problema sa kalidad sang edukasyon sa pungsod.
