Isa ka 19-anyos nga puti nga mustang nga si Gringo kag ang iya trainer nga si Lauryn Zepeda opisyal nga nagbutang sang Guinness World Record para sa titulo nga “most tricks performed by a horse in three minutes”.
Nakarekord sila sang makahalawathawat nga 38 tricks sa sulod lamang sang 2 minutes kag 47 seconds.
Suno kay Zepeda, si Gringo natawo nga isa ka wild horse antes gin-adopt sang gobyerno. Napulo ka tuig na sila nga nagapasundayag, kag sa baylo nga maggamit sang tradisyonal kag masami mabudlay nga mga pamaagi sa paghanas sa mga kabayo, nagagamit siya sang clicker training kag mga pagkaon nga masami ginahatag sa mga ido.
Bangud sini, wala ginakabig ni Gringo nga trabaho ang iya ginagamit kundi isa ka hampang nga pirme may dala nga crackers bilang balos.
Lakip sa mga tricks nga ginhimo ni Gringo amo ang pagkuha sang habol sa iya likod, paghampang sang bola, pag-wave sang gamay nga bandera sang USA, pagtokar sang gamay nga halampangan nga piano, paghuyop sang trumpeta, kag bisan ang pag-pose para sa selfie kag pag-bow sa katapusan sang routine.
Sa pagsaulog sang ila kadalag-an, naghanda sila sang mga tacos kag cake para sa mga tawo kag para kay Gringo.
Pahayag ni Zepeda, ini nga rekord nagapamatuod nga may yara sang makatawo nga mga pamaagi sa pagtudlo sa mga kabayo sang mga tricks, kag ang mga sapat mangin mas matinumanon kon sila huptan nga malipayon kag wala ginapilit.
