Ginpaguwa na ni Senate President Vicente Sotto III ang iya Statement of Assets, Liabilities, and Net Worth (SALN), sa diin nagapakita nga ang iya kabug-usan nga assets nagalab-ot sa P188, 868,123.40.
Base sa Certified True Copy sang SALN nga ginpaguwa sang talatapan ni Senate Secretary Atty. Renato Bantug Jr. sang Hunyo 30, 2025, ginreport ni Sotto nga ang iya mga real property nagabalor sang P335.17 milyones.
Nagalakip ini sang tatlo ka mga balay kag lote — nga ang pinakamahal nga isa ginabanta sa P235 milyones — subong man sang duha ka condominium units, duha ka residential lots, kag isa ka agricultural lots.
Nagabalor sang P130.4 milyones ang iya mga personal propedad rason nga naglab-ot na sa P465.6 milyones ang kabug-usan nga assets ni Sotto.
May mga utang man si Sotto nga nagabalor sang P276.7 million, lakip na ang loan sa bangko, personal loan, kag iban pa nga balayran.
Bangud sini, yara na sa P188.9 million ang iya net worth.
Ang manggad ni Sotto nagtaas sang P103.2 million sa nakaligad nga lima ka tuig — halin sa P85.6 million sang 2020 tubtob sa karon nga balor.
Sang 2016, nagabalor sang P63.8 million ang iya assets.
Sa amo man nga dokumento, gindeklarar man sang senador nga may yara ini sang walo ka mga himata nga nagaserbe man sa gobyerno. Ang iban sa ila yara sa iya opisina.
Si Sotto kilala man nga isa ka regular nga host sang isa ka noon time show matapos nga temporaryo nga naghalin bilang senador.
