ROXAS CITY – Hugot nga ginakondinar ni House Deputy Minority Leader kag ACT Teachers Party-list Rep. France Castro ang tuman nga kabutigan sang China may kaangtanan sa pinakaulihi nga banggianay sang barko sang Chinese Coast Guard kag Philippine supply boats sa bahin sang West Philippine Sea.
Pahayag ni Castro, klaro nga ang pagbalabag kag pagbunggo sang Chinese Coast Guard ship sa barko sang Pilipinas nga magadul-ong sang supply sa Ayungin Shoal ang isa ka pamaagi sang panggamo, pagpamigos kag paglapas sa sovereign rights sang pungsod.
Suno pa kay Castro nga ang presensya sang China kag mga aktibidad sa West Philippine Sea pati ang 9-dash line claim sini ang kabaliskaran sa 2016 Arbitral ruling. Bangud sini, nagapanawagan si Castro sa Marcos administration nga magpakita sang mabakod nga panindugan sa soberenya kag pag-amlig sa interes sang Pilipinas batuk sa amat-amat nga pagsakop sang China.
