ROXAS CITY – Ginpatpat ni Capiz Governor Esteban Evan ‘Nonoy’ Contreras ang mga nahimuan sang iya nga administrasyon sa una nga 100 ka adlaw sa iya nga pagpungko bilang gobernador sa gindul-ong sini nga State of the Province Address (SOPA) sa 50th Golden Thanksgiving sang gobyerno-probinsiyal kadungan man sang iya kaadlawan sa Capiz Gymnasium.
Suno kay Contreras nga pinaagi sa iya nga 6K plus 1 Agenda, mahatagan sini sang katumanan ang iya mga ginpasalig sa mga pumuluyo sang ini ang nagakampanya pa lamang.
Mahibaluan nga kalakip diri amo ang Karsada (Infrastructure), Kaayong Lawas (Health), Kabuy-anan kag Trabaho (Livelihood and Employment), Kaalam (Knowledge and Skills), Kaayo sang Palibot (Environment), kag Kalinong (Peace and Order).
Ginpahayag ni Contreras nga ang Karsada ukon Imprastraktura ang labing kinahanglanon para mapabaskog ang ekonomiya sang probinsiya gani ginhatagan sini sang igtalupangod ang repair and rehabilitation sang masobra 20 ka kilometro nga mga provincial roads kag padayon nga pagkaayo sang Roxas Memorial Provincial Hospital kalakip na diri ang pagtukod sang Malasakit Center.
Pag-abot naman sa Ikaayong Lawas nahimo nga masolusyunan ang problema sa pagtimbuok sang kaso sang balatian nga dengue kag ang paghatag sang pinansiyal nga bulig pinaagi sa Medical Assistance Program sang Department of Health kag GT Foundation.
Ginsuguran man ang Kabalaka Caravan, Kapitolyo sa Barangay kun sa diin nagatanyag sang libre nga serbisyo-medikal sa mga kabaranggayan.Sa Kabuy-anan kag Trabaho, ginsolusyunan man ang problema sang mga mangunguma bangud sang epekto sang Rice Tarrification Law kag ginpunggan nga makasulod sa probinsiya ang African Swine Fever (ASF) virus.
Sa patag sang turismo, ginpanginbulahan man ni Contreras ang Provincial Tourism and Cultural Affairs Office nga nakaangkon sang kadalag-an bilang Hall of Famer sa Best Tourism Month Celebration-Provincial Level Category, Grand Winner sa Best Culture and Arts Program kag 1st Runner Up sa Best in Promotional Video.
Ginpasalig man sini ang pagpabaskog pa sang paghatag sang serbisyo sang Public Employment Service Office (PESO).
Para naman sa programa nga Kaalam, ginalauman sang gobernador nga gilayon na nga maaprubahan ang ginaduso nga institutionalized scholarship ordinance nga dako nga bulig para sa pag-eskwela sang ‘deserving’ nga mga estudyante.
Sa Kaayo sang Palibot, ginpahayag sang gobernador nga suportado sini ang tikang sang Sangguniang Panlalawigan nga magpapasar sang resolusyon para sa 50-year ban sang large scale mining sa probinsiyal kag strikto nga implementasyon sang mga laye batuk sa illegal small-scale mining ukon quarry.
Gindugang pa sini nga pasangkaron man ang Disaster Risk Reduction Management (DRRM) sang probinsiya agud mapabaskog ang kahandaan sa tion sang kalamidad.
Pag-abot naman sa Kalinong, ginpasalamatan sang gobernador ang Capiz Police Provincial Office (CPPO) agud mapasiguro ang kalinong kag katawhay sa bilog nga probinsiya.
Sa ulihi, ginpahayag sang gobernador nga ang iya una nga 100 ka adlaw ang ‘prelude’ ukon panugod pa lamang kag madamo pa ini sang plano para sa probinsiya.
Tinguhaan sini nga mapatuman ang iya handom nga ang Capiz mangin isa ka probinsiya nga naga-Kabalaka, Caring-Capiz nga ‘safe, just, healthy, prosperous and people-centered province’.
Sa ika-50 anyos nga kaadlawan sang gobernador, sa baylo nga siya ang regaluhan, ginpili sini nga siya ang maghatag sang regalo sa mga Capizeño pinaagi sa Kabalaka Caravan Service Day.
