MANILA, Philippines – Ginsuportahan sang mayorya sang mga Pilipino ang pagpakig-alyansa sang gobyerno sa iban nga pungsod agud maprotektahan ang teritoryo sa West Philippine Sea (WPS).
Sa pakig-upod sa mga kaalyado kag pareho sang panglantaw nga mga pungsod, suno sa pinakaulihi nga survey sang Pulse Asia nga gin-komisyon sang Stratbase Group kag ginpagwa sang Miyerkules.
Base sa survey nga ginpatigayon sang Mayo 3 tubtob Mayo 7, 86 porsyento sang mga respondents ang nag-uyon nga dapat depensahan sang Pilipinas ang WPS kaupod sang mga pungsod nga nagasuporta sa 2016 arbitral ruling nga nagakilala sang eksklusibo nga katungod sang pungsod sa nasambit nga katubigan.
Tatlo lamang ka porsyento ang wala nag-uyon, samtang 11 porsyento ang wala pa makadesisyon.
Sa kada rehiyon, ang Mindanao ang may pinakamataas nga suporta sa amo nga posisyon sa 91 porsyento, ginsundan sang Metro Manila sa 90 porsyento, Visayas sa 86 porsyento, kag Luzon sa guwa sang Metro Manila sa 82 porsyento.
Suno kay Victor Andres “Dindo” Manhit, presidente kag chief executive officer sang Stratbase Institute, ginapakita sang resulta nga gusto sang mga Pilipino nga mangin mabakod ang tindog sang gobyerno sa pagdepensa sang West Philippine Sea samtang ginapatuman ang 2016 arbitral ruling kag ginapalig-on ang relasyon sa mga kaalyado nga nagasuporta sa internasyonal nga kasuguan.
Sa pagpili naman sang mga pungsod nga dapat pakig-updan sang Pilipinas sa pagdepensa sang WPS, 84 porsyento sang respondents ang nagpili sa Estados Unidos, 67 porsyento sa Japan, 57 porsyento sa Australia, 51 porsyento sa Canada, kag 44 porsyento sa South Korea.
Ginpahayag man sang Stratbase Institute nga ginapakita sang resulta nga ginakilala sang mga Pilipino ang kalainan sa tunga sang mga pungsod nga nagasuporta sa legal nga katungod sang Pilipinas sa WPS kag sang mga pungsod nga ginatudlo nga nagadugang sang tensyon sa rehiyon.
Nahibaluan nga ginpatigayon ang survey sa 1,500 ka respondents sa bug-os nga pungsod kag may margin of error nga plus or minus 2.5 porsyento.
