ROXAS CITY – Ginsabat sang gobyerno sang syudad ang kagastuhanan sa pagpauli sang mga Locallly Stranded Individuals (LSIs) nga madugay na nga stranded sa Metro Manila bangud sa COVID-19.
Ginpahayag ni Mayor Ronnie Dadivas nga mas o menus sa 182 ka mga LSIs ang maga-abot sakay sa 2GO vessel sa Culasi port.
Apang ginklaro sang alkalde nga indi tanan mga residente sang Roxas City ang magaabot subong nga hapon bangud may 64 ka mga LSIs nga gikan sa magkatuhay nga kabanwahanan sa probinsiya sang Capiz nga nakasakay.
Kasunod sa pag-abot sang mga LSIs ang pagpaidalum sa ila sa minimum health standard kasubong sa thermal scanning, footbath kag rapid testing sa Hortus Botanicus.
Sa tion nga magnegatibo ang resulta sa rapid test sang mga LSIs mahimo na lamang sila nga magpaidalum sa home quarantine.
Apang i-monitor sila sang mga opisyales sang natungdan nga barangay kalaip sang mga Barangay Health Emergency Response Team (BHERTS).
Nahibaluan man nga may yara sang passenger manifest ang 2GO vessel sa mga nangin pasahero nga LSI agud mangin madali ang contact tracing.
