ROXAS CITY – Nagdepensa karon ang tag-iya sang boarding house sa Barangay 9 nga gina-estaran sang mga badjao sa Roxas City matapos nahibaluan nga nagabayad sang tag P30 tagsa ka tawo sa isa ka adlaw ang mga badjao sa gina-estaran nga hulot.
Ginpahayag ni Kagawad Gina Roxas nga mamag-an ang nasambit nga kantidad kag nagakaigo lamang sa ginabayaran sini nga kuryente kag tubig kada bulan sa ginaparentahan nga boarding house.
Ginklaro man ni Roxas nga wala nalakip sa pagsuluktan kada adlaw ang mga bata kabaliktaran sa ginaalegar sang mga badjao.
Wala man sang nakita nga malain ang opisyal sa pagparenta sa mga badjao sang boarding house, bangud may yara na sila sang ginapulian kag indi na sila makita sa kilid sang dalanon nga nagatulog.
Ginpanindugan pa ni Roxas nga ang badjao nga nagarenta sa iya boarding house ang may mga trabaho kasubong sa pagbaligya sang mga burloloy.
Antes ang mga badjao may nauna nga boarders nga nagatenir diri, apang nagtransfer lamang sang naguba ang mga atup bangud sa paglaslas sang bagyo
Nahibaluan nga nangin kontrobersiyal ang mga badjao kasunod sang ginbuy-an nga diskurso pribilihiyo ni City Councilor Midelo Ocampo nga nagaduso sang ordinansa nga matapna ang pagduging sang mga badjao sa syudad sang Roxas.
