Nagpaguha sang report ang Department of Agriculture (DA) Operations Center tuhoy sa kahalitan nga dala sang shear line sa pila ka parte sang pungsod.
Kalakip sa apektado amo ang palay, mais, high-value crops, livestock kag poultry sa Mimaropa, Western Visayas, Eastern Visayas, Davao kag Soccsksargen Regions.
Ang nasambit nga kahalitan ang nagasakop sa 3,692 ektarya sang agricultural lands, nga may kadamuon sang pagkasamad sa produksyon nga 472 metriko tonelada kag nakaapekto sa indi magnubo sa 1,887 mangunguma.
Pinakadako nga parte sang nahalitan nga nagdangat sa 86 percent ang nagikan sa rice production nga may kabug-usan nga P58.44 million.
Ang pagkalugi naman sa mga alaga nga sapat kag manok ang yara sa P4.12 million, high-value crops (P2.87 million) kag mais (P2.23 million).
Posible pa ini nga madugangan sa mga masunod nga adlaw bangud sa nagapabilin nga mga pag-ulan sa pila ka parte sang pungsod.
