ROXAS CITY – Nagdangat sa masobra P400 milyon ang nangin kahalitan sa mga imprastraktura tuga sang bagyong Agaton sa primier distrito sa probinsya sang Capiz.
Sa interview sang Bombo Radyo kay District Engr. Randolfo Melo Santos, suno diri nga tuman nga naapektuhan ang banwa sang Panitan kun sa diin nagkalaguba ang flood river control kag ongoing nga mga proyekto sa nasambit nga lugar.
Bangud sa pagbaha nagtuga ini sang pagkaguba sang karsada mapa-konreto man ukon asphalt kag pag-clogged sang mga drainage.
Suno sa engineer, nagtukod ini sang investigation team agud mag-monitor sa mga nagkalaguba nga proyekto.
Posible nga magataas pa ang kantidad sang nahalitan bangud nagapadayon pa sa karon ang pagtsekyar sa mga lugar nga naapektuhan sang bagyo.
Samtang, ginpanginwala sini ang alegasyon nga sub-standard ang pag-ubra sang mga proyekto sa idalum sang Capiz 1st Engineering District bangud, personal sini nga ginamonitor ang pag-ubra sang mga proyekto kaupod ang presensya sang quality control engineer kag indi sini luyag nga sub-standard lamang ang kalidad sang mga proyekto.
