ROXAS CITY – Naglab-ot sa kabug-osan nga P200,000 ang nangin kahalitan sang sunog sa balay sang mag-asawa nga sanday Police Staff Sergeant Aljon Berdugo, miyembro sang Provincial Drug Enforcement Unit kag manunudlo sa Culasi National High School nga si Juvy Berdugo sa Mendoza Urban, San Roque Street, Barangay Inzo Arnaldo, Roxas City.
Mahibaluan nga ang nasambit nga balay ang ginapanag-iyahan sang isa ka retirado nga pulis nga si Alexmar Albaran sang Barangay Milibili, sining siyudad.
Nahibaluan nga gintupok gid sang kalayo ang ginaparentahan nga duha ka mga puluy-an sa nasambit nga lugar.
Base sa inisyal nga imbestigasyon nga madasig naglapta ang kalayo bangud human sa mixed light materials ang nasambit nga mga balay.
Magluwas diri nasunog man ang gina-rentahan kun sa diin ang isa diri ang ginarentahan ni Divina Flaga, 34 anyos sang Barangay Nasunugan, Dao, kaupod ang iya duha ka mga kabataan kag tiyo.
Suno sa Bureau of Fire Protection-Roxas City Fire Station, padayon pa nila sa karon nga ginapadalman ang ila imbestigasyon natuhoy sa gintunaan sang sunog kag kun pila ang tul-id nga kahalitan nga natuga sini.
