Kahalitan sang nasunog nga multicab sang anay punong barangay, naglab-ot sa P10,000

ROXAS CITY – Naglab-ot sa P10,000 ang kahalitan sa pagkasunog sang isa ka multicab nga salakyan sa Barangay Sibaguan, Roxas City.

Ang nasambit nga salakyan ang ginapanag-iyahan ni anay punong barangay Fredelito Alvarez sang nasambit nga lugar.

Base sa inisyal nga imbestigasyon ni FO3 Esperedion Elaura Jr., arson investigator sang Roxas City Fire Station hinali na lamang nga nagkalayo ang nasambit nga salakyan matapos nga nagpanimaho ang makina sini.

Nahibaluan nga gintupok sang kalayo ang front seats sang nasambitan nga salakyan.

Maswerte naman nga wala sang may naangkon nga pilas sa lawas ang amo nga driver.

Samtang, gilayon naman nga nagresponde sa lugar ang mga katapo sang Roxas City fire Station agud mapalong ang kalayo.