Kahalitan sang sunog sa isa ka establisyemento komersyal sa banwa sang Mambusao, Capiz naglab-ot sa P15K

ROXAS CITY – Ginabulubanta nga nagalab-ot sa P15,000 ang kahalitan nga ginbilin sang sunog sa isa ka RTW Store sa Barangay Poblacion Tabuc, Mambusao Capiz.

Ang nasambit nga puwesto ang ginapanag-iyahan ni Mae Lacson sang nasambit nga lugar.

Sandig sa inisyal nga imbestigasyon sang Bureau of Fire Protection-Mambusao nga nakabaton sila sang pagpanawag gikan sa mga concern citizen nga may yara sang naga-spark sa linya sang kuryente sa amo puwesto.

Gilayon nga nagrespondi ang mga katapo sang bombero kun sa diin gilayon nga gintapna ang naga-spark nga kuryente nga posible ginalantaw nga gintunaan sang kalayo gikan sa ikaduha nga panalgan sang amo nga establisyemento.

Nagapadayon naman ang imbestigasyon sang mga bumbero sa nasambit nga sunog.