ROXAS CITY, CAPIZ- Patigayunon ang Kahublagan Kontra Korapsyon sang pila ka mga raliyista sa syudad sang Roxas sa Nobyembre 30, 2025.
Sa interview sang Bombo Radyo kay Darlene Blando Surriga, Social Science Teacher kag Convenor sang Alliance of Concerned Teacher, iya ginpahayag nga katuyuan sang amo nga kahublagan ang pagpakigbahin sa panawagan nga untaton na ang korapsyon nga nagakahinabo sa pungsod.
Suno kay Surriga, indi lamang sa iban ka mga ka probinsyahan sang pungsod nagakahinabo ang mga pagbaha, mismo diri sa probinsya sang Capiz naeksperyensyahan man.
Pahayag niya, sa iya nga madumduman, 25-anyos na ang nakaligad, may pila ka mga dialogues na nga natabo natuhoy sa mga mabinahaon nga lugar sa probinsya, apang tubtob sa subong, wala sa gihapon sang maayo nga solusyon nga nahatag ang pila na ka mga opisyales nga nagpungko sa pwesto.
Ginpakigbahin sang manunudlo nga nagatangis ang iya nga taghipusuon sa kada tion nga may makita ini nga mga puluy-an nga atop nalang ang nagatuhaw bangud lubog na sang tubig-baha, kag sa mga pumuluyo nga naga-antos sa kada may pag-ulan bangud nga nagalangoy na sa baha.
Nahibaluan nga bangud sa mga palpak kag maanomaliya nga flood control projects sa pungsod nga natukiban, nadiskubre man ang mga dalagkuan nga pagpangawat sa kaban sang mga opisyales nga yara sa pwesto rason nga padayon ang panawagan sang mga pumuluyo sang transparency, accountability kag good governance.
Patigayunon ang nasambit nga hublag-protesta sa syudad sang Roxas sang nagkalain-lain nga mga sector sa idalom sang Kahublagan Kontra Korapsyon Capiz, sa takna la 1:00 tubtob las 3:00 sang hapon sa Nobyembre 30 sa Roxas City Bandstand, Roxas City Plaza.
Nagapanawagan ang natungdan sa mga pumuluyo sang kooperasyon, bangud nagapati ini nga kun hugpong sa pagpanawagan ang mga pumuluyo, sigurado nga pamatian ini sang mga kurap nga opisyal kag makabatyag sang huya ang mga makawat.
Interviewed by Bombo Sunnie Mae Constantino Batencila
