Magahiwat sang nagkalain-lain nga programa ang mga anti-corruption groups sa pila ka bahin sang Western Visayas bilang pagdumdom sang ika-54 nga anibersaryo sang deklarasyon sang Martial Law sa Setyembre 21.
Sa interview sang Bombo Radyo kay Raoul Manuel, Karapatan National Council Member, iya ginpahayag nga ang sentro sang ila programa amo ang pagpanukot kag pagpanabat sa mga opisyales nga gina-alegar nagakawat sang kwarta sang pumuluyo.
Suno kay Manuel, dapat manabat ang tanan nga involved sa alegasyon sang korapsyon agud indi na masulit pa ang kasubong nga aktibidad sa gobyerno.
Ginpahayag pa sini nga importante ang padayon nga pagbantay kag partisipasyon sang publiko agud masiguro ang accountability kag transparency sa gobyerno.
Nagalaum ang grupo nga madamo pa nga mga pumuluyo ang magatambong kag magabuylog sa ila mga programa kag nagapanawagan sang hustisya kag accountability.
