Ginsumiter na sang National Bureau of Investigation (NBI) sa Office of the Ombudsman ang resulta sang ila imbestigasyon may kaangtanan sa ginapatihan nga mga misdeclarations nga deklarasyon sa Statement of Assets, Liabilities, and Net Worth (SALN) ni Vice President Sara Duterte.
Ginpamatud-an ni NBI Director Atty. Melvin Matibag ang pagturn-over sang resulta sang imbestigasyon sa Ombudsman, nga amo na ang may hurisdiksyon sa pagpadayon sang pag-usisa sa kaso.
Nakita man ang mga NBI agent nga nagdala sang madamo nga kahon sang mga dokumento kag ebidensya nga may kaangtanan sa ginapatihan nga mga propiedad nga wala ukon indi husto nga nadeklara sa SALN sang bise presidente.
Suno kay Matibag, mas maayo nga ang Ombudsman na ang mag-isyu sang subpoena agud mapatawag si Duterte, imbes nga ang NBI pa ang maghimo sini.
Dugang pa sang direktor, lakip sa ginatun-an sang imbestigasyon ang isa ka propiedad nga gindeklara bilang agricultural land, nga suno sa iya may yara man sang helipad. Base sa resulta sang ila imbestigasyon, may mga ginapatihan nga undeclared properties si Duterte nga kinahanglan pa nga usisaon sang Ombudsman.
