Ginkumpirma sang Provincial Health Officer ang kakulang sang medical technologist para maka-operate sang 24 oras ang RT-PCR Molecular Laboratory sang probinsiya sa Barangay Lanot, sining syudad.
Ginpahayag ni Dr. Alex Nolasco nga lima ka beses lamang sa isa ka semana ang operasyon sang nasambit nga laboratoryo kag kada Miyerkules kag Biyernes nga adlaw kasunod sang pag-untat sang operasyon, ang pagdala sa West Visayas Medical Center sa Iloilo sang mga swab samples gikan sa Roxas Memorial Provincial Hospital.
Sa nasambit nga mga inadlaw ginahatagan sang tsansa ang mga medical workers, labi na ang mga medtech nga makapahuway.
Ginklaro ni Nolasco nga may limitasyon man ang tanan kag indi mahimo nga magtrabaho na lamang ang mga medtech kag i-dingut sa ila ang kahigayuan nga makapahuway.
Ginpahayag sang opisyal nga indi kinahanglan sang kumpetisyon sang duha ka RT-PCR laboratory sang syudad kag probinsiya bangud sa karon nga panahon sang pandemya kinahanglan ang suporta kag pagbuligay sang kada isa.
Ginapanindugan man ni Dr. Nolasco nga efficient ang RT-PCR test molecular laboratory sang probinsiya sa diin naga-test ang RMPH sang 90 ka mga samples sa isa lamang ka adlaw.
Madugay na nga nagapangita sang dugang nga medtech para sa facilidad bangud sila ang may ihibalo sa pagpadalagan sa nasambit nga laboratoryo,apang tobtob sa karon wala pa sang may nag-apply.
Samtang nagapati man si Dr. Nolasco nga wala sang dapat debatihan kun sin-o nga RT-PCR Laboratory sa syudad ukon probinsiya ang mas competent.
Importante nga mahatagan atensyon kun paano mapatuman ang minimum health standard kag mapanubuan ang kaso sang COVID-19 sa kada probinsiya.
