Ginabasol karon ang pagka-aksidente kag pagkapatay sang isa ka driver sa motorsiklo sa kakulang sang mga signages, warning devices, kag wala mapadayon nga 4 lane road widening project sa Barangay Mianay, Sigma, Capiz.
Sa pagpakig-angut sang Bombo Radyo kay Gina, utod sang biktima nga si Jay-R Berino, ginpahayag sini nga mabudlay para sa ila nga pamilya nga batunon ang natabo sa iya utod.
Suno diri nga tuman ang pagpangasubo sang ila pamilya bangud sa nadangatan sang iya magulang.
Ginapanindugan ni Gina nga indi hubog ang iya magulang sang nagmaneho ini sa motorsiklo.
Nag-apelar sang bulig ang pamilya Berino sa kun sin-o man ang may maluluy-on nga tagipusoon bangud sa ila bill sa ospital .
Sa pihak nga bahin, nagakahagawa naman ang mga residente sa amo nga lugar bangud sa wala mapadayon nga 4 lane road widening project sa barangay.
Ginpahayag ni Manang Inday, residente sang nasambit nga lugar nga nabalaka ini para sa mga motorsita nga indi familiar sa lugar.
Ginpalab-ot sini sa natungdan nga ahensiya sang gobyerno nga nagasupervise sa nasambit nga proyekto nga tapuson na kuntani sang contractor ang ila nasuguran kag pahamtangan sang nagakaigo nga signages ukon early warning device, agud makita sang nagapadulong nga mga motorista kag makapanginlaman sila..
Masubo man panumdumon nga kinahanglan pa nga may madisgrasya kag madulaan sang kabuhi antes butangan sang early warning devices ang nasambit nga proyekto .
