ROXAS CITY – Kakulangan sa suplay sang Personal Protective Equipments (PPE’s) ang ginaproblemahan karon sang mga health frontliners sa probinsya sang Capiz agud nga maproteksyunan ang ila nga kaugalingon batuk sa coronavirus disease 2019 (COVID-19) pandemic.
Suno kay Dr. Jocelyn Mosquete, presidente sang Capiz Medical Society nga indi lamang ang probinsya ang nagakinahanglan sang mga PPE’s subongman ang iban nga mga kapungsoran nga apektado sang nasambit nga balatian.
Ginpahayag ni Mosquete nga nagahimo na lamang sang pamaagi ang mga health officials pinaagi sa paghimo sang mga improvised PPE’s nga gamiton sang mga health workers nga nagatatap sa mga pasyente partikular na sa mga Person’s Under Investigation (PUIs).
Dugang pa sang opisyal nga may yara man sang pribado nga grupo kag indibidwal ang padayon nga nagabulig sa mga frontliners pinaagi sa paghatag sang ila mga kinahanglanon.
Mahibaluan nga daku ang mabulig sang mga PPEs sa mga health fronliners kaangay sang mga doktor kag nurses kag iban pa nga hospital staff agud malikawan nga malatnan sang nasambit nga virus.
Nagpanugyan man ini sa publiko nga kuntani likawan ang diskriminasyon indi lamang sa mga frontliners kundi amo man sa mga pasyente nga nagpositibo sa COVID19.
Magluwas diri, nagdesignar man sila sang mga lugar nga mahimo ma-estaran sang tanan nga mga frontliners nga na-expose sa mga pasyente kag apektado sang diskriminasyon sa ila tagsa ka mga ginapulian kag suportado man ang mga ini sang pagkaon kag iban pa nila nga mga kinahanglanon.
Samtang, nagpanugyan man si Mosquete sa publiko nga magkaon sang mga masustansiya nga pagkaon kapareho sang prutas kag utan, magtulog sang nagakaigo nga oras, maggamit sang face mask, magpahuway sang insakto, magkaun sang masustansiya nga pagkaun, mag-inom sang madamo nga tubig, kag magtumar sang mga bitamina agud mapabaskog ang immune system.
Kun nakabatyag naman sang sintomas, kinahanglan gilayon nga magkadto sa ospital para sa monitoring kag likawan man ang mga tawo nga nagasuprer sang ubo, sip-on, lagnat ukon iban pa nga sintomas nga nagapakita sang senyales sa pag-angkon sang amo nga balatian.
