ROXAS CITY – Wala sang liwan nga ginabasol ang Iloy sang naaksidente-patay sa ginwasak nga dalan sa Poblacion Tabuc, Maayon, Capiz kundi ang kakulangon sa early warning devices.
Sa interview sang Bombo Radyo kay Mrs. Maribel de Justo, balo kag iloy sang napatay nga 1st year criminology student nga si Jericho de Justo, diretsahan sini nga ginsiling nga wala sang insakto nga early warning devices ang ginbungkal nga karsada sa ila atubang sang balay, sa national highway sang Poblacion Tabuc, sa amu nga banwa.
Ginsiling sang iloy nga sandig sa kuha nga CCTV footage sa pagka-aksidente sang iya bata, makit-an nga mahinay ang pagpadalagan ni Jericho sang Suzuki raider 150 bangud malapit na ini makalab-ot sa ila puloy-an.
Ginkakibot lang sang tiya sang biktima, sang Sabado sang gab-i, Mayo 13, nga may naaksidente sa karsada kag sa ila pagtsekyar indi sila makapati nga ila ini himata.
Ginklaro man sang Iloy nga nagikan si Jericho sa Brgy. Indayagan sa iya Tiyo kag ginhatagan ini sang isa ka botelya sang ilimnon apang wala ini matunga bangud naglaong ini nga magpauli bangud magatuon pa suno diri.
Nasubuan lang ang Iloy bangud wala makahibalo ang iya bata nga ginbungkal ang amu nga dalan, bangud sa Roxas City ini nagatenir kag nagpahibalo lang nga mapauli sang Sabado bangud plano sini nga magkinasadya kuntani sa Mother’s Day.
Ginkatingala man ni Mrs. de Justo kun ngaman ginwasak ang tunga nga porsyon sang four lanes sang karsada bangud maayo paman ang sitwasyon sang dalan.
Sa karon, plano sang Iloy nga magpangayo bulig sa ila alkalde sa Maayon nga mahatagan sang hustisya ang hilaw nga kamatayon sang iya ikaduha kag hinipo nga bata kag mapasabat ang dapat manabat.
