Gin-athag ni House Secretary General Reginald Velasco ang impormasyon nahanungod sa ₱20 milyon nga budget para sa ikatatlo nga State of the Nation Address ukon SONA ni Presidente Ferdinand Bongbong Marcos sa Hulyo 22.
Ginhatagan sang pagtamod ni Velaso, nga kalakip sa nasambit nga 20-million pesos ang gastuson sa ginahimo nga preparasyon sa SONA nga nagsugod pa sadtong Marso 12, sang gintukod ang SONA task force.
Suno kay Velasco, kaupod man sa budget ang mga Inter-Agency Coordination Meeting nga ginatambungan sang nagkalain-lain nga departamento kag ahensya nga kabahin sang preparasyon sa SONA.
Pahayag pa sini nga ang pagkaon sa adlaw sang SONA ang para sa mga bisita, internal staff kag external personnel kaangay sang pulis nga magabantay sa seguridad sa palibot sang Batasan Complex subong man ang mga tinawo sang Metropolitan Manila Development Authority (MMDA) kag iban pa nga support staff.
Ginmensyonar man ni Velasco, nga kalakip man sa pagagagastusan sang Kamara ang tatlo ka set sang uniporme sang kapin 2,000 nga mga empleyado sang House Secretariat nga pagagamiton indi lamang sa adlaw sang SONA kundi sa adlaw-adlaw nga pagtrabaho.
Suno pa diri nga may balayran man para sa mga dugang nga tinawo kag equipment nga magasiguro sa seguridad sang SONA kag dugang nga medical support nagikan sa kalapit nga ospital.
Dugang pa sini, magluwas sa mga imbitasyon kag giveaways, may ginrentahan man nga LED walls kag iban pa nga equipment agud mapanami ang audiovisual presentation kag overall ambiance sa sulod sang plenary hall kag Batasan Complex subong man ang mga dekorasyon kasubong sang mga naka-paso nga mga bulak kag iban pa nga tanom.
