Ginasuportahan ni Faustino ‘Bojie’ Dy III ang isa ka hagna nga nagatinguha magtukod sang isa ka nationwide Integrated Emergency Medical Services System (EMSS) agud masiguro ang mas madasig, organisado kag de-kalidad nga medikal nga pagresponde sa bug-os nga pungsod.
Ini ang natabo matapos aprubahan sang House Committee on Health ang konsolidasyon sang siyam ka mga hagna nga nagatumod nga himuon nga institusyonal ang EMSS sa national, regional kag lokal nga lebel.
Suno kay Ciriaco Gato Jr., chairman sang komite, bisan may yara na sang national nga emergency hotline sa sulod sang isa ka dekada, kulang gihapon ang pungsod sa isa ka nagahiusa nga sistema sang emergency medical response.
Ginpahayag niya nga ang kasubong nga nagkalain-lain nga sistema sa subong nga tion nagadulot sang malawig nga response time kag mga kamatayon nga mahimo pa tani malikawan.
Sa idalom sang bag-o nga hagna, pagapatumanon ang isa ka nagahiusa nga nasyonal nga pamatasan para sa pagsanay sang mga emergency responder, emergency transport services, koordinasyon sa mga ospital, kag regulasyon sang mga ambulansya.
Nagpahayag man sang bug-os nga suporta ang Department of Health pinaagi kay Dr. Albert Francis Domingo, nga naghatag sang importansya sa pagpalig-on sang pre-hospital emergency care, labi na gid sa mga malayo kag kabukiran nga mga komunidad.
Samtang, suno naman kay Percival Cendaña, isa sa mga nagsulat sang hagna, ang ini nga tikang magabulig sa paghiusa sang mga serbisyo nga ginahatag sang mga LGU, pribado nga ambulansya kag volunteer organizations sa isa ka organisado kag epektibo nga emergency medical response.
