Ginpaathag ni House Secretary General Reginald Velasco ang impormasyon naangut sa ₱20 milyon nga budget para sa ikatlo nga State of the Nation Address (SONA) ni Presidente Ferdinand Bongbong Marcos Jr. sa Hulyo 22.
Gintalupangdan man ni Velasco, nga kalakip sa nasambit nga balor sang budget ang galastusan sa ginahiwat nga pag-preparar sa SONA nga nagsugod pa sadtong Marso 12, nga kun san-o muna man ang tion nga nabuo ang SONA task force.
Ginpahayag ni Velasco, kaupod man sa mga galastusan ang mga Inter-Agency Coordination Meeting nga ginatambungan sang nagkalain-lain nga mga departamento kag ahensya nga kabahin man sang preparasyon sa SONA.
Suno kay Velasco, ang pagkaon sa mismong adlaw sang SONA ang para sa mga bisita, internal staff kag external personnel kasubong sang pulis nga magabantay sa serguridad sa palibot sang Batasan Complex, amo man ang mga katapo sang Metropolitan Manila Development Authority (MMDA) kag iban pa nga mga support staff.
Kaupod man suno diri ang tatlo ka set sang uniform sang 2,000 ka mga empleyado sang House Secretariat nga ila pagagamiton indi lamang sa adlaw sang SONA kundi, pagagamiton man ini nila sa adlaw-adlaw nga pag-ubra sang mga ini.
Dugang pa ni Velasco, may balayran man para sa mga dugang nga tawo kag paraphernalias nga magapabilin sa seguridad kag katawhay sang SONA.
Magluwas diri, para naman sa mga imbitasyon kag giveaways, may gin-rentahan man mga ini nga LED walls kag iban pa nga equipment, agud mapanami ang audiovisual presentation kag overall ambiance sa sulod sang plenary hall kag Batasan Complex, amo man ang mga dekorasyon kasubong sang mga tanum kag bulak.
