Ginkumpirmar ni House of Representatives spokesperson Princess Abante sang Sabado, Hulyo 19, nga nagsabat na ang Kamara sa mandu sang Korte Suprema nga maghatag sang impormasyon kag dokumento sa impeachment ni Vice President Sara Duterte under oath.
Nag-ugat ang mando sang korte sa mga petisyon nga ginpasaka sang kampo ni VP Sara nga nagatinguha nga pauntaton ang impeachment trial batuk sa Bise Presidente.
Sa isa ka pahayag, ginpahayag sang opisyal sang Kamara nga ang Office of the Solicitor General (OSG), nga naga-akto bilang counsel sa Kamara, ang nagsumiter na sang pleading online pinaagi sa Philippine Judiciary Portal kag ginserbe ini sa tanan nga natungdan pinaagi sa electronic service.
Natalana man suno sa iya nga isumiter sa Korte Suprema ang physical copy paagi sa personal service sa Lunes.
Gin-athag man ni Atty. Abante nga kabahin sang Order of Business ang una nga tatlo ka mga reklamo batuk sa Bise Presidente sa sulod sang 10-session-day nga timeline nga ginmando sang konstitusyon.
Ang ikaapat ginasuportahan sang kapin sa un-tersia sang mga katapo sang Kamara, nga ginpadala direkta sa Senado bilang Articles of Impeachment.
Ginpasalig man ni Atty. Abante sa publiko nga magapabilin nga available ang due process para sa Bise Presidente sa bug-os nga impeachment trial agud depensahan ang iya bahin kag mapresentar ang mga ebidensya.
