Ginpagwa na sang Philippine Army ang initial result sang imbestigasyon sa posible nga gintunaan sang kamatayon sang duha ka mga kadete sa training.
Suno sa army, ang gintunaan sang kamatayon sang duha ka trainees amo ang ‘heat stroke.
Base sa resulta sang medical certificate nga gin-issue sang mga doktor nga nag-eksamin sa mga trainees, napatay ang mga ini bangud sa epekto sang tuman nga kainit sa ila ikaayong lawas.
Nagtuga ini sang mga komplikasyon sa ikaayong lawas nga sa ulihi nagdul-ong sa ila kamatayon. Lakip diri ang mga komplikasyon sa utok kag paghubag sang ila lawas.
Nagpanindugan aman ang PA nga gilayon sini nga buligan ang duha ka mga recruits nga ma-rescue matapos nga natumba samtang yara sa formation. Sang ulihi, gindala man sila sa Camp O’Donnell Medical Treatment Facility samtang wala sila sang animo kag yara sa kritikal nga kahimtangan.
Liwat nga nagpalab-ot sang simpatiya ang bug-os nga army sa pamilya sang duha ka mga biktima nga ginkilala kanday Candidate Soldiers Johndyl Lemosniro kag Junel Flores.
Naghalad man sang pangamuyo ang army para sa duha ka napatay.
